VHP Paris teraktı ilə bağlı bəyanat yaydı

Noyabrın 13-də Fransanın paytaxtı Parisdə dəhşətli terror aktları törədilib. Ölənlərin və yaralıların sayı yüzlərlədir. Dünyanın hansı nöqtəsində baş verməsindən asılı olmayaraq, insan qətli, zor, təcavüz və terror qəbuledilməzdir.    

Vətəndaş Həmrəyliyi Partiyası Paris şəhərində çoxsaylı insan təlafatı ilə nəticələnmiş terror aktını qətiyyətlə pisləyir və bəşəriyyətin bəlasına çevrilmiş terrorizmə qarşı mübarizədə beynəlxalq ictimaiyyətin səylərini yaxından dəstəklədiyini bir daha bəyan edir.

Azərbaycan terrordan ziyan çəkən və dəfələrlə terror faciəsi ilə üz-üzə qalan bir ölkədir. Buna görə də Azərbaycan xalqı Fransa xalqının kədərinə ürəkdən şərikdir. Terrora heç bir halda haqq qazandırıla bilməz və səbəbindən asılı olmayaraq terror lənətlənməlidir.

VHP terrorizmə qarşıdır və həmişə bütün dünyanı ona qarşı birləşməyə çağırıb. Bu hadisə bir dinin adına yazıla bilməz. Terrorun dini və milləti yoxdur və bu gün ən çox müsəlman ölkələri və müsəlmanlar terrorla qarşı-qarşıyadırlar. Fransada baş verən terror hadisəsi bəşərriyyətin gələcəyini düşünən xalqları sülh və insanlıq naminə birləşdirməlidir. Fransa xalqına başsağlığı verir, ağır faciəni törədənlərin layiqli cəza alacaqlarına inamımızı ifadə edirik.