Vətəndaş Həmrəyliyi Partiyası milli azadlıq hərəkatının ən aktiv iştirakçılarından olan Məhəmməd Hatəmi Tantəkinin vəfatı ilə bağlı nekroloq yayıb.

VHP mətbuat xidmətindən mediaya göndərilən nekroloqda deyilir:

“Azərbaycanın milli azadlıq hərəkatının fəallarından olan, ömrünü ölkəmizin müstəqilliyi yolunda mübarizəyə həsr edən Məhəmməd Hatəmi Tantəkinin vəfatı bizi dərindən kədərləndirir.

Məhəmməd Hatəmi hələ 60-ci illərdən, milli şüurun oyanması istiqamətində ziyalıların apardığı gizli təbliğatın öncüllərindən olmuşdu. Hatəmi bircə dəfə də yolundan dönmədi, heç bir siyasi təzyiqdən çəkinmədi və inandığı, arzuladığı ideallarına doğru getdi.

1988-ci ildə başlayan Milli Azadlıq Hərəkatında isə Hatəmi artıq öndə idi. Həmin dövrdə Məhəmməd Hatəmi sinninin ahıl çağına yaxınlaşmışdı və Elmlər Akademiyasında çalışırdı. Buna baxmayaraq, hərəkatın ilk günlərindən, mitinqlər zamanı rus əsgərlərinin təzyiqlərinin qarşısında gənclərlə birgə sinə gərirdi.

Məhəmməd Hatəmi səmimi vətəndaş, bu azadlıq mübarizəsindən şəxsi mənfəət olaraq heç nə ummayan mücahid idi. Azərbaycan müstəqilliyə qovuşandan, ölkənin başı üzərindən parçalanma təhlükəsi ötəndən, siyasi stabillik yaranandan sonra Məhəmməd Hatəmi də kənara çəkildi, Bakı bağlarında kimlər üçünsə bağbanlıq etməklə ömrünü davam etdirdi. Heç vaxt da narazılıq etmədi, əlinin zəhməti ilə dolanmağı hər şeydən üstün tutdu.

Məhəmməd Hatəmi arzusunun bir hissəsinə çatdı – Azərbaycanın müstəqilliyini gördü. Ancaq onun əsas ideyası, məfkurəsi Bütöv Azərbaycanda yaşamaq, Güneyin azadlığını görmək, qüdrətli və bütöv Azərbaycanın vətəndaşı olmaq idi. Bu arzularının dünyanın indiki nizamında, bu zamanda reallaşmasının hələ çox tez olduğunu bilirdi və buna görə də siyasi-ictimai mühitdən kənarlaşmışdı. Ancaq bu arzuları və xəyallarından bir an da olsun imtina etməmişdi və söhbətlərinin mövzusu Bütöv Azərbaycan idi.

Məhəmməd Hatəmi “qabığı ağacı qoruduğu kimi, dövlət də milləti qoruyur, şükür ki, millətimiz qorunur” deyirdi, ancaq hər zaman da sözünü 40 milyonluq Güneyli soydaşlarımızın pozulan hüquqlarının üzərinə gətirib, onların da qorunmaq haqqının olduğunu bildirirdi. Bu baxımdan Məhəmməd Hatəmi mübarizəsinin bəhrəsini görən, müstəqil Azərbaycanda yaşamaq haqqı qazanan xoşbəxt ziyalı, digər tərəfdən isə arzularına yetməyən, ideallarına qovuşmayan həsrətli insan kimi dünyadan köçdü.

Bu mübariz, ruhunda Böyük Azərbaycanı yaşadan və milli ideallar uğrunda özünü fəda edən ziyalının vəfatı münasibəti ilə Azərbaycan xalqına dərin hüznlə başsağlığı verir, böyük ziyalımıza Allahdan rəhmət diləyirik”.

Comments are closed.