Bu gün Türkiyədə növbəti parlament seçkiləri keçirilib. APA-nın xəbərinə görə, Türkiyədə səsvermə hüququ olan 50 389 265 nəfərdən 41 328 072 nəfəri səsvermə hüququndan istifadə edib.

Bakı vaxtı ilə saat 22.50-yə olan məlumata görə, nəticələrin 95 faizi açıqlanıb.

İlkin nəticələrə görə, AKP 50,4 faiz, CHP 25,8 faiz, MHP 13, 1 faiz, müstəqillər 5,5 faiz səs alıb. Beləliklə, indiki nəticələrə görə, AKP-nin 326, CHP-nin 135, MHP-nin 53, müstəqillərin isə 36 nümayəndəsi Türkiyə Böyük Millət Məclisinə üzv seçilib.

Qeyd edək ki, bu AKP-nin qalib olduğu üçüncü seçkidir.
_____


Rəcəb Tayyip Ərdoğan: “Bu seçkinin qalibi Türkiyədir”

Türkiyədə keçirilmiş parlament seçkilərinin nəticələrinə görə, qalib olmuş Ədalət və İnkişaf Partiyasının (AKP) rəhbəri Rəcəb Tayyip Ərdoğan partiyasının Ankaradakı mərkəzinin önündə toplaşmış tərəfdarlarının qarşısında çıxış edib.

APA-nın xəbərinə görə, o, partiyasına səs verən hər kəsə, seçkinin nəticələri ilə maraqlanan tərəfdaş ölkələrə təşəkkürünü bildirib.

O deyib ki, partiyası Türkiyədə hər iki seçicidən birinin səsini alıb: “Biz demokratik dəyərlər içərisində üçüncü müddət üçün millətimizdən yetki almanın həyəcanını yaşayırıq. Biz vurmağa deyil, sevməyə gəldik. Qarşılığı olanda eynən bu yola davam edərik, qarşılığı olmayanda da cavabını verib keçərik”.

Ərdoğan deyib ki, AKP 2007-ci ildə 16 milyon seçicinin, bu seçkidə isə 21 milyon seçicinin səsini alıb: “Biz bunun xoşbəxtliyini yaşayırıq. AKP-yə olan etibarından dolayı bütün millətimə təşəkkür edirəm. Bu seçkinin qalibi Türkiyədir. Bu gün bir daha Türkiyə, demokratiya, milli iradə, millət qazandı. Bu gün millət bütün suallara, gərginliklərə son nöqtəni qoydu”.

O bildirib ki, bu gün ölkəsinin bütün insanları, həmçinin bölgə qazanıb: “Bu gün Türkiyə qədər Qəzza, Şam, Qüds, Qafqazlar, Yaxın Şərq qazanıb. Heç bir mübahisə olmadan mənim millətim qazanıb”.

Ərdoğan deyib ki, Türkiyə növbəti dəfə bölgəsinə və dünyaya örnək olan demokratik seçki keçirib.

AKP başqanı Türkiyənin önündə yeni səhifə açıldığını bildirib: “Yeni AKP hökuməti də bütün Türkiyənin hökuməti olacaq. Biz kimsəni kənara atmadıq, ayırmadıq, hamını qucaqladıq. Biz 74 milyonun birgə yaşaya bildiyi bir Türkiyə istəyirik”.

Ərdoğan deyib ki, hansı partiyaya səs verməsindən asılı olmayaraq, bütün vətəndaşlarının sülh və ədalət içində yaşamasını təmin edəcəklər: Etdiklərimiz edəcəklərimizin təminatıdır”.

AKP başqanı happy wheels demo ölkədə azadlıqların artacağına, hər kəsin özünü daha rahat ifadə edə biləcəyinə təminat verdiyini deyib: “Biz üzərimizdə böyük bir əmanət daşıyıq. Bu gün o əmanətin ağırlığı daha da artıb. Bu millətə xidmət etməyə davam edəcəyik. Millətimizin bizə verdiyi etibar mesajını ən doğru şəkildə oxumağa çalışacağıq, çünki millət bizə təkcə etibar etmədi, həm də bir vəzifə verdi”.

Ərdoğan bildirib ki, Türkiyənin yeni Konstitusiyanı müzakirə ilə, uzlaşma ilə həll edəcəklər: “Sivil, azadlıqsevər bir Konstitusiyanı birlikdə qəbul edəcəyik, bu Konstitusiyada hamı özünü görə biləcək. Yeni Konstitusiya millətin hər bir fərdini birinci sinif olaraq görəcək. Bu-türkün, kürdün, zazanın, lazın, ərəbin, ələvinin, gürcünün-yəni 74 milyonun Konstitusiyası olacaq, birlik və bərabərlik üzərində təsis ediləcək”.

AKP rəhbəri ümummilli məsələlərdə müxalifətlə müzakirə aparacaqlarını, hətta parlamentdən kənarda qalan partiyalar və QHT-lərlə də əməkdaşlıq edəcəklərini bildirib.

O, yatırımların davam etdiriləcəyini, sosial xidmətlərin artırılacağını bildirib: “Milli birlik, qardaşlıq məsələlərində, bölgəsəl və beynəlxalq problemlərin həllində aktiv olacağıq. Bölgəmizdə sülh, haqq, ədalət, barışıq, azadlıq və demokratiya deyəcəyik”.

O daha sonra bütün rəqiblərindən halallıq istəyib: “Heç kimsə üzülməsin, kimsənin sevinci digərini üzməsin, çünki biz hamımız birlikdə Türkiyəyik.

Kampaniya dövründə qəlbini qırdığımız insanlardan, istəmədən incitdiyimiz siyasilərdən başda özüm olmaqla partiyadaşlarım adına halallıq istəyirəm.
Mən siyasətçilərə, bütün siyasi partiyalara haqqımı, haqqımızı halal edirəm”.

_____

CHP başqanı: “AKP-yə uğurlar arzulayıram”

“Üç təməl mesajım olacaq. Bütün Türkiyəyə CHP bu qısa zamanda 3,5 milyon yeni seçici qazanıb. Daha güclü bir CHP var”. APA-nın xəbərinə görə, bunu Türkiyədəki parlament seçkilərinin nəticələrinə münasibət bildirən Cümhuriyyət Xalq Partiyasının başqanı Kəmal Kılıcdaroğlu deyib.

O deyib ki, seçimə girib millət vəkili sayını artıran tək partiya CHP-dir. Digərləri millət vəkili sayını azaldıblar: “Demokratiyaya həmişə güvəndik. AKP-yə uğurlar arzulayırıq. Amma unutmasınlar ki, daha güclü CHP var. Sadəcə, AKP yox, bütün dünya bunu unutmasın. Daha gənc, dünyaya daha azad baxan CHP var”.

K. Kılıncdaroğlu bildirib ki, partiyasının konstitusiya, azadlıq, media azadlığı məsələləri ilə bağlı mübarizəsi davam edəcək.

CHP başqanı deyib ki, Türkiyənin 81 bölgəsinə gedib: “Sabahdan yenə eyni həyəcanı yenə seçim varmış kimi davam etdirəcəyik. Altı ay içində 3,5 milyon seçici qazanırıqsa, qarşıdakı 4 ildə iqtidar olmağı bacaracağıq”.

O, tərəfdarlarına “əhvalımızı pozmayacağıq” deyə, çağırış edib.

Comments are closed.