Son günlər Rusiyada miqrantlarla bağlı vəziyyət yenidən gərginləşib. Belə ki, şimal qonşumuzda miqrantlara qarşı keçirilən reydlərdə minlərlə saxlanılanlar arasında 200-ə qədər azərbaycanlının da olduğu deyilir. Hazırda Moskva ətrafında miqrantlar üçün çadır düşərgələri yaradılıb. Rusiya mətbuatının yaydığı məlumatlara görə, saxlanılan bir neçə azərbaycanlı deportasiya da olunub.
Azərbaycanda müəyyən siyasi dairələrdə Rusiyada baş verənlərin Azərbaycanda keçiriləcək prezident seçkilərində də təsir edəcəyi, eyni zamanda bunun bir növ Kremlin təsir mexanizmi olduğu deyilir. Yəni bununla rəsmi Moskva Bakıya təsirini gücləndirir.
Diaspordakı mənbələrdən publika.az-a daxil olan məlumata görə, düşərgələrdə 200-ə qədər azərbcanlının olması şişirdilmiş rəqəmdir: “Moskva ətrafı qurulan çadır düşərgələrində azərbaycanlılar var, bu, düzdür. 
Düşərgələrin qapıları önündə azərbaycanlıların öz qohumlarının gözləməsi də bunu təsdiqləyir. Onlar mətbuatdan, televiziyalardan gizlənməyə çalışırlar, lakin bu onu göstərir ki, saxlanılanlar arasında azərbaycanlılar var. Amma 200 rəqəmi şişirdilib”.
Mənbə bildirib ki, çadır düşərgələrində saxlanılanların əksəriyyəti vyetnamlılardır. Onun sözlərinə görə, Moskvanın arxa rayonlarında çoxlu sayda sexlər fəaliyyət göstərir ki, orada çalışanlar, adətən, elə həmin sexlərdə də yaşayırlar: “Qeyri-leqal şəraitdə fəaliyyət göstərən həmin sexlərdən bəziləri hətta illərlə çıxmırlar. Azərbaycanlılar isə əsasən bazarlarda fəaliyyət göstərir və əksəriyyəti Rusiya vətəndaşıdır. Çünki artıq vətəndaşlığı olmayanların bazarlarda çalışması çətindir. Saxlanılanlar isə Orta Asiya, Vyetnam, Çindəndir. Suriyadan olanlar da var. Hətta Türkiyənin Şərq vilayətlərindən olan tikinti şirkətlərinin işçiləri də var”.
Mənbənin məlumatına görə, azərbaycanlıların sayı 200-ə qədər olmasa da, hər düşərgədə 2, yaxud 3-ə qədər soydaşımız var. Onun sözlərinə görə, Azərbaycanda bəzi müxalif qüvvələr bunu birbaşa Azərbaycana qarşı təzyiq kimi qələmə verir, bunun seçki ərəfəsi sosial partlayışa səbəb olacağını deyir: “Lakin bu, bütün MDB-dən olan miqrantlara qarşı keçirilən reydlərdir. Düşərgələrdə isə azərbaycanlılar 7-ci, 8-ci siyahıda dayanırlar. Moskva federal miqrasiya xidmətinin reydlərinə azərbaycanlılar düşür. Demək olar ki, hər reyddə bir, yaxud iki azərbaycanlı saxlanılır. Lakin onlar birbaşa qanun pozuntusuna, yaxud ciddi qeyri-qanuni fəaliyyətə görə saxlanılmır. Bizim azərbaycanlıların rus dilini bilmə qabiliyyəti Orta Asiya, Vyetnam, yaxud digərlərindən olanlarla müqayisədə qat-qat yaxşıdır. Azərbaycanlıların 99 faizi da təhsillidir və onlar öz hüquqlarını çox yaxşı bilirlər. sadəcə olaraq, azərbaycanlıları digərləri ilə müqayisə etmək gülməlidir”.
Mənbə qeyd edib ki, miqrantlarla bağlı son vaxtlar baş verənlər və deportasiyalar təkcə Azərbaycanı deyil, bütün MDB ölkələrini əhatə edir. Yəni. digər MDB ölkələrinin vətəndaşları da Rusiyadan deportasiyaya məruz qalırlar. O əlavə edib ki, Rusiya prezidenti Vladimir Putin Federal Miqrasiya Xidmətinin qarşısına ölkə ərazisində qanundankənar yaşayan və işləyən şəxslər ölkədən çıxarılması ilə bağlı vəzifə qoyub: “Çünki Rusiyada seçkiqabağı orta statistik ruslarla miqrantlar fərqlənməlidir. Lakin Rusiyada miqrantlara “bu tacikdir”, “bu ermənidir”, “bu özbək, yaxud azərbaycanlıdır” deyə yanaşmırlar. Burada populyar kütlələr var. Bazarlarda əsasən azərbaycanlılar, yol-tikinti işlərində ermənilər, yerdə qalan qara işlərdə isə taciklər çalışırlar. Rusiya KİV-i bunu cəmiyyətin beynində bu cür kristallaşdırıb. Bu gün Moskva əhalisinin hamısı deyil, yalnız 50-60 faizi miqrantlara mənfi münasibət bəsləyirlər”.

Mövzu ilə bağlı söhbətləşdiyimiz VHP Siyasi Şurasının üzvü və Azərbaycan Miqrasiya Mərkəzinin rəhbəri Əlövsət Əliyev bildirib ki, bu, Rusiya dövlət başçısının göstərişi ilə həyata keçirilən tədbirlərdir. 
Onun sözlərinə görə, Rusiyanın dövlət başçısı göstəriş verib ki, kənd təsərrüfatı məhsullarının satıldığı bazarlarda göstərilən qanunsuz göstərilən fəaliyyətlərə son qoyulsun: “Amma təəssüf ki, bir qrup millətçi şəxslər bunu etnik mənşəyinə görə qeyri-rus olan şəsxlərə qarşı yönəldiblər və bütün bazarlarda qeyri-rusların sıxışdırılmasına, kütləvi surətdə təmizləməyə başlayıblar. Orta hesabla 200 nəfərədək azərbaycanlı da saxlanılıb və onların Rusiyadan deportasiya ediləcəkləri gözlənilir. Təəssüf ki, zərərçəkən qruplar içərisində daha çox zərər çəkənlər azərbaycanlılardır. Onlar üzərində yoxlamalar aparılıb, demək olar ki, hamısı milis idarələrinə aparılıb. Güman edirəm ki, bu, Rusiyadan azərbaycanlıların kütləvi qayıdışına, yəni azərbaycanlıların Rusiyanı tərk etməsi problemli hallara gətirib çıxarmayacaq. Yəni geri qayıtmaq halları diqqəti cəlb edəcək səviyyədə olmayacaq”.
Müsahibimiz qeyd edib ki, Rusiya millətçiləri bununla daim qeyri-rusları, o cümlədən azərbaycanlıları daim təzyiq altında saxlamağa çalışırlar: “Çox təəssüf ki, millətçilərin qeyri-qanuni hərəkətlərinə Rusiyanın hüquq-mühafizə orqanları da göz yumur, yaxud da buna şərait yaradırlar. Yəni bu, Rusiyanın həyata keçirdiyi siyasətdir. 
Onlar istəyirlər ki, Rusiya milli azlıqlardan təmizlənmiş durumda olsun, Rusiyada yalnız ruslar yaşasın. Digər tərəfdən, ruslar bununla Rusiyada yaşayan milli azlıqları daim nəzarətdə saxlamağa cəhd göstərirlər. Ruslar bu cür hərəkətlər etməklə, hadisələr törətməklə və dövlət orqanları onların əməllərinə göz yummaqla öz şovinist mövqelərini qoruyub saxlayırlar. Hətta qanunverici və icraedici orqanlar səviyyəsində də Rusiyanın miqrasiya ilə bağlı həyata keçirdiyi siyasətdə də bu, özünü çox aydın göstərir”.
Bununla belə  Ə.Əliyev qeyd edib ki, miqrantlarla bağlı baş verənlər Azərbaycana qarşı yönələn dövlət siyasətinin nəticisi kimi qiymətləndirmək düzgün olmazdı: “Düzdür, bundan zərər çəkənlər həm də azərbaycanlılardır, amma daha çox Rusiya Federasiyasının ərazisində yaşayan qeyri-ruslara yönəlmiş addımdır. Çünki bu hadisə əvvəlcə bir dağıstanlının rus polis zabitinə xəsarət yetirməsi ilə başladı. Rusiya Federesiyasının ərazisində və Rusiyadan kənarda yaşayan keçmiş SSRİ vətəndaşlarına rusların, rus millətçilərinin gücünü göstərmək siyasəti Rusiyada həmişə mövcud olub. Bu, hakimiyyətin irəli sürdüyü, müəyyən etdiyi siyasətdir və bu siyasət daim davam edir. Konkret bu məsələdə azərbaycanlılara qarşı xüsusi münasibət və ayrı-seçkilik yoxdur və mən bunu hiss etmirəm”.
Səxavət Həmid
Teleqraf.com

Comments are closed.